PLAN RENOVE PARA A CALEFACCIÓN E O AIRE ACONDICIONADO

O Instituto Enerxético de Galicia (INEGA) acaba de presentar o novo Plan Renove de Equipos de Climatización 2010 destinado a conceder axudas de aforro e eficiencia enerxética nos fogares galegos.

Esta segunda edición do Plan Renove dispón de un orzamento de 1 millón de euros para subvencionar o cambio de caldeiras, equipos de climatización e bombas de calor de baixa eficiencia enerxética, por outros equipos de alta eficiencia enerxética con potencia nominal térmica entre 5 e 70 kw.

A contía da subvención poderá chegar ata o 25% do custo da instalación e depende da potencia nominal instalada. Así, as axudas para caldeiras de condensación poden alcanzar os 1.320 € mentres que a substitución de equipos de aire acondicionado e bombas de calor pode acadar unha subvención de 3.840 €.

Poderán ser beneficiarios das subvencións as persoas propietarias de vivendas ou edificios do sector terciario que deberán acudir a un establecemento adherido a dito Plan para que lle tramiten a solicitude. A listaxe de establecementos adheridos publicarase na páxina web do INEGA: www.inega.es

O prazo para acollerse ás axudas comeza o 3 de febreiro e rematará o 30 de xuño de 2011 se non se esgotan antes os fondos dispoñibles.

A DEPUTACIÓN LOA A SITUACIÓN ECONÓMICA DE O PINO

Un estudo cualifica a xestión económica municipal como "excelente tanto dende o punto de vista orzamentario como do económico e financeiro"

IV CERTAME DE CORAIS EN O PINO

Terá lugar o vindeiro domingo ás 19:30 h. no Centro Sociocultural

O Coro Santa Eulalia de Arca e o Concello de O Pino organizan conxuntamente o cuarto certame de corais integrado na programación municipal de Nadal.

O certame celebrarase no serán do domingo 2 de xaneiro, a partir das 19:30 horas no Auditorio do Centro Sociocultural Luís Seoane.

O coro anfitrión estará acompañado pola Coral Polifónica de Urdilde, a agrupación Coto da Nai, de Aríns e a coral Santa Eulalia de Senra – Oroso.

Cada agrupación interpretará tres temas do seu repertorio e logo actuarán conxuntamente para interpretar o Himno Galego como peche do evento.

Será o primeiro acto cultural municipal no 2011.

ADXUDICADA A CONSTRUCCIÓN DA NOVA ESCOLA INFANTIL DE O PINO

O prazo de execución das obras é de oito meses, polo que podería estar operativa para o curso 2011-2012

O Consorcio Galego de Servizos de Igualdade e Benestar cerrou o proceso de adxudicación da obra da futura Escola Infantil Municipal por un montante de 647.820 euros, sendo a empresa Eulogio Viñal Obras y Construcciones seleccionada entre as 48 firmas que concorreron ao proceso de contratación das obras.

A nova escola será construída en Arca e disporá de 41 prazas para escolares de entre 3 meses e tres años de idade, distribuídas en tres unidades.

A entrada en funcionamento do futuro centro está planificada para finais do ano 2011 formando parte da Rede de Escolas Infantís de Galicia Galiña Azul.

Na actualidade, O Pino conta con un Punto de Atención á Infancia (P.A.I.), localizado en Pedrouzo que funciona os días laborables en horario de mañá (09:30-13:30) e tarde (16:00-20:00) para atender a nenas e nenos con idades comprendidas entre os 6 meses e os 3 anos.

OS MUNICIPIOS ASUMIRÁN A XESTIÓN DA LIMPEZA NOS CENTROS PÚBLICOS INTEGRADOS.

O conselleiro de Educación e Ordenación Universitaria, Xesús Vázquez Abad e o presidente da Federación Galega de Municipios e Provincias (FEGAMP), Carlos A. Fernández Castro asinaron onte, 28 de decembro, un convenio para a xestión dos gastos de limpeza dos centros públicos integrados (CPIs).

Mediante o convenio, a Consellería transfire 735.000 euros á Fegamp para que os reparta entre 37 concellos con CPIs a fin de que sexan as corporacións municipais as que xestionen, controlen e paguen os servizos de limpeza dos centros públicos integrados.

HAI UN TEMPO PARA CADA COUSA.

Xosé Luís chegou moi contento á casa logo do seu primeiro día e escola en Boavista.
Seu pai, véndoo feliz preguntoulle que tal lle fora coa mestra Susa.
- Moi ben. Xa aprendín a escribir!
- Estupendo! -Dixo o pai sorprendido-. E que escribiches?
- Non sei. Aínda non aprendín a ler.

PROGRAMA NADAL LÚDICO

Organizado polo departamento de deportes do Concello, os vindeiros 28 e 29 de decembro desenvolverase o programa NADAL LÚDICO 2010 no Polideportivo Municipal.

As actividades realizaranse entre as 16:30 e as 19:30 horas, serán gratuítas e van dirixidas a tódalas idades. Así, os máis cativos disporán de inchables, haberá tamén obradoiros de manualidades con globoflexia, modelaxe… e torneos multideportivos de fútbol 3x3 e basket 3x3 para as diferentes idades.

CLAUSURA DO OBRADOIRO DE EMPREGO EN O PINO

Desenvolveuse durante doce meses e os participantes recuperaron infraestruturas municipais na fase práctica.

O delegado territorial da Xunta na Coruña, Diego Calvo, e o alcalde de O Pino, Manuel Taboada, clausuraron o obradoiro de emprego “Camiño Francés-O Pino II” en un acto celebrado o pasado mércores 23 de decembro, no que fixeron entrega dos títulos acreditativos aos 33 alumnos participantes.

O obradoiro de emprego “Camiño Francés-O Pino”, que se desenvolveu durante doce meses divididos en dúas fases de seis meses cada unha, foi promovido polo Concello e financiado pola Consellería de Traballo e Benestar, que investiu un total de 699.851 euros na realización desta actuación destinada a mellorar as posibilidades reais de acceso ao mercado laboral dos 33 participantes.

As persoas que se formaron no obradoiro obtiveron coñecementos de albanelería, carpintería e xardinería que puxeron en práctica na reconstrución do local social de Cebreiro, no peche da tribuna do campo de fútbol de O Pino e no acondicionamento das áreas recreativas de Vilar, San Mamede-Ferreiros e na carballeira de Suso-Ferreiros.

Para desenvolver as accións formativas e de prácticas, o obradoiro contou con un equipo composto por un director, un mestre para cada especialidade, un mestre de formación empresarial, unha titora e unha auxiliar administrativa contratados baixo a modalidade de obra e servizo e que tamén se beneficiaron desta actividade formativa.

Os alumnos participantes nesta actividade foron contratados baixo a modalidade de contrato de formación e percibiron unha retribución mensual de 950 euros.

FESTIVAL DE NADAL 2010

O programa incluíu a actuación de tódolos escolares de E. Infantil e E. Primaria do CPI e das escolas unitarias do Concello.

O mércores día 22 a partir das 10:30 horas desenvolveuse no auditorio do Centro Sociocultural Luís Seoane o tradicional Festival de Nadal promovido como actividade complementaria do CPI Camiño de Santiago en colaboración coas escolas unitarias.

Abriron o festival os escolares de Educación Infantil. Comezou o grupo de catro anos con “O Papá Americano cargado de agasallos”; logo, o grupo de tres anos escenificou “Buscando Papá Noel...”; seguidamente, os pequerrechos de cinco anos representaron “Burbullas” para dar paso ao escolares das unitarias que actuaron conxuntamente coa obra “Paseo en trineo”.

A actuación dos grupos de primaria iniciouse coa intervención conxunta dos escolares de 1º e 2º con “Panxoliñas de Nadal”, seguidos do grupo de 3º, que escenificou “Waka Waka”. Logo, os maiores de 6ºB aportaron “O Papá Noel marchoso”, antes de que o grupo de 4º lembrara a Michael Jackson con “Smooth Criminal”. De seguido, un grupo de extraescolares reivindicou a Britney Spears con “Womanizer”, e os veteráns de 6ºA escenificaron “Blanca Navidad”. Máis tarde, outro grupo de extraescolares emulou a Batuka Junior con “Brujería” e finalmente, os escolares de 5º de EP cerraron o festival regueifando “Regueifas”.

Pola súa banda, o alumnado da ESO tivo unha xornada ordinaria de clase na que as respectivas titoras e titores entregaron as cualificacións correspondentes á primeira avaliación. Nas dúas últimas sesións, o alumnado de 3º e 4º trasladouse ao polideportivo para participar nunha actividade de cerre de trimestre.

ÉXITO DAS ACTIVIDADES DE NADAL SOLIDARIO NO CPI CAMIÑO DE SANTIAGO

Os contedores da OPERACIÓN KILO e de XOGUETES PARA A ILUSIÓN, tiveron que ser baleirados varias veces ao longo dos vinte días de campaña.


O pasado martes, 21 de decembro rematou no CPI Camiño de Santiago a campaña de Nadal Solidario con un faladoiro coloquio.

O acto, que se desenvolveu na sala de usos múltiples, comezou cunha actividade audiovisual e seguidamente membros da Asociación GONDWANA ofreceron unha charla na que informaron da súa actividade.

Gonwana é unha organización sen ánimo de lucro que, da man de Cáritas, naceu en Galicia hai dez anos para dar acollida e asesorar legalmente a persoas inmigrantes en situación de exclusión social, pero que foi crecendo e adaptándose para dar resposta a tódalas situacións de pobreza que chaman á súa porta, a que cada vez acoden máis persoas do noso entorno. Agora dispoñen dun banco de alimentos todo o ano para cubrir situacións momentáneas de precariedade.

Recentemente, o Concello de Santiago recoñeceu o labor social desta entidade concedéndolle o XVII Premio VAGALUME colectivo por ser "unha das organizacións que en Compostela crean confianza social, por xerar un espazo de participación que xunta a persoas inmigrantes de moi diferentes procedencias e culturas, por desenvolver un labor fundamental dende os diferentes ámbitos de actividade nos que traballan: social, cultural, inserción, comunitario, cooperación"

Preguntados polos escolares de ESO, os representantes da asociación presentes explicaron que eles son persoas voluntarias que colaboran de forma altruísta logo de rematar a súa xornada laboral.

Contaron que antes do venres 24 á tardiña, clasificarán e distribuirán os alimentos recollidos no CPI Camiño de Santiago nuns paquetes de Nadal que logo serán entregados a algunhas das 1200 familias que teñen no seu rexistro.

Logo, clasificarán os xoguetes por idades para repartir na noite de Reis nunha festa que farán cos “seus Reis Magos”.

A coordinadora da Asociación, Alejandra, en nome de tódolos membros de Gondwana expresou o seu agradecemento, de xeito sincero e humilde, con esta iniciativa de compartir un pouquiño do noso.

Rosa Andión, coordinadora da actividade no CPI agradeceu a aportación xenerosa do alumnado e das familias como “o mellor xeito de expresar o desexo de BO NADAL, indo MÁIS ALÁ”. Tamén lle transmitiu a Gondwana “o noso agradecemento por todo o que fan, polo seu xeito e espírito solidario todo o ano e tamén por facer posible que as nosas aportacións, A NOSA SEMENTE, CHEGUE A ESAS PERSOAS QUE O PASAN PEOR CA NÓS”.

AVALIACIÓN DE DIAGNÓSTICO CORRESPONDENTE AO CURSO 2010-2011

O alumnado de 2º de ESO realizará as probas os 11 e 12 de maio.

Os escolares de 4º de Primaria realizaranas o 19 e 20 do mesmo mes.

A actual Lei de educación e os decretos que a desenvolven establecen a obrigatoriedade de realizar unha avaliación de diagnóstico -de carácter censual- das capacidades básicas do alumnado que cursa ensinanzas de educación primaria e educación secundaria obrigatoria.

Na Resolución do 3 de decembro de 2010, publicada no DOG Nº 238, do martes, 14 de decembro dítanse instrucións para o desenvolvemento da avaliación de diagnóstico correspondente ao curso 2010/2011, que terá lugar os días 11 e 12 de maio de 2011 para segundo curso de educación secundaria obrigatoria e os días 19 e 20 do mesmo mes para educación primaria.

As competencias básicas que se avaliarán serán a competencia en comunicación lingüística, a competencia matemática e a competencia no coñecemento e a interacción co mundo físico.

Para desenvolver a proba, empregaranse Caderniños do alumnado para cada unha das competencias avaliadas, así como Cuestionarios de contexto dirixidos ao alumnado, familias, dirección dos centros educativos e profesorado titor dos grupos avaliados.

Realizará a proba de avaliación de diagnóstico todo o alumnado escolarizado en 4º curso de educación primaria, e en 2º curso de educación secundaria. Queda exento da celebración da proba o alumnado que teña unha discapacidade física ou psíquica que represente un obstáculo insuperable para a súa realización.

Todas as persoas do centro educativo que interveñan no proceso están obrigadas á confidencialidade tanto do contido das probas como dos resultados obtidos en relación a grupos de alumnado e alumnado en particular. Tamén é de aplicación o establecido na Lei de protección de datos de carácter persoal.

POEMAS ALUMEADOS, A NOSA PROPOSTA PARA ESTE NADAL.

Seoane, o ilustrador ilustrado.

Con motivo da celebración do primeiro centenario do nacemento de Luís Seoane (Bos Aires, 1 de xuño de 1910- A Coruña, 1979), presentouse no pasado mes de novembro o libro Poemas Alumeados

A obra recolle en 84 páxinas, unha selección de 14 poemas do polifacético Luís Seoane traducidos ao galego pola editora Rosa Espiñeira Pan e acompañado cada un deles por unha ilustración doutros tantos artistas plásticos contemporáneos: Pepe Barro, Lipa Burd, Xaquín Chaves, Correa Corredoira, Felipe Criado, Gabú, Detlef Kappeler, Tiago Madeira, Jesús Núñez, Xoán Piñón, Hermenegildo Sábat, Xosé Salgado, Lía Santana, Reiner Schiestl e Pilar Turbón.

Esta xoia, con formato 24x17 cm. e encadernada en tela, está editada por figurandorecuerdo(s)edicións e contén un limiar de X. L. Méndez Ferrín.

Trátase dunha boa opción para agasallar no Nadal cunha escolma da obra poética de Seoane ilustrada por artistas contemporáneos.

E o prezo? Arredor dos 14 €.

O OBSERVATORIO AUTONÓMICO DA CONVIVENCIA ESCOLAR CELEBROU A SÚA REUNIÓN ANUAL

A este órgano incorporáronse novos membros

Na sesión celebrada o pasado venres 27 de decembro, o Observatorio Autonómico da Convivencia Escolar renovou os seus membros e constituíu a Comisión Permanente que formulará as propostas para a mellora da convivencia nos centros educativos.

Entre as novas incorporacións ao Observatorio figuran o Fiscal de Menores de Galicia, Carlos Mariscal de Gante; a especialista en trastornos conductuais e membro do equipo de orientación específico da Coruña, Rosa Cazón; e a profesora da Universidade de Vigo Mª Carmen Pereira Domínguez, especialista na investigación da educación en valores e a intervención pedagóxica.

Na sesión, o conselleiro de Educación, Xesús Vázquez Abad, anunciou que o departamento do que é titular está a traballar na redacción dunha norma de rango legal que cree e reforce os instrumentos xurídicos que permitan mellorar a convivencia nos centros educativos e o recoñecemento da función social do docente, así como a participación das nais e pais; e cuxas liñas expuxo diante do Observatorio.

O Observatorio Autonómico traballará en propostas para que o alumnado galego acade os máximos niveis de competencia social e cidadá, relacionadas coa promoción da convivencia e a resolución pacífica dos conflitos; reducindo, ao tempo, ao mínimo o fracaso escolar.

Os representantes da Consellería destacaron a importancia que ten a figura do Orientador/a para o fomento da convivencia nun centro educativo, pois é o dinamizador das medidas curriculares e organizativas de atención á diversidade, ademais de promotor de accións tendentes ao éxito escolar e á educación inclusiva.

O Observatorio da Convivencia do CPI Camiño de Santiago quedou constituído na última sesión do Consello Escolar celebrada o xoves 9 de decembro.

LUÍS SEOANE HOMENAXEADO POLA RAG NO CEMITERIO CORUÑÉS DE SANTO AMARO

A Real Academia homenaxeou tamén aos intelectuais galegos enterrados neste camposanto.

A Real Academia Galega (RAG) homenaxeou onte na Coruña a Luís Seoane ao rematar o ano do centenario do nacemento deste ilustre pensador galego. A RAG estendeu esta homenaxe aos personaxes relevantes da cultura e política galega enterrados neste camposanto de A Coruña.

Ao evento asistiron máis dun cento de persoas entre as que figuraban os actuais dirixentes da RAG, concelleiros do municipio herculino, parlamentarios, representantes universitarios e de distintas asociacións culturais.

O acto iniciouse ás portas do cemiterio de Santo Amaro. Actuaron de guías o secretario da Real Academia -Xosé Luís Axeitos- e a edil herculina María Xosé Bravo, responsable da concellería de Cultura, quen se referiu a Seoane no acto de recepción dos participantes como "o home da sensibilidade universal, quen dixo que a arte sempre ten que estar ó servizo da verdade". "Foi un home capaz de romper as falsas dicotomías do rural e do urbano, da tradición e da modernidade, do popular e do culto". Pola súa banda Axeitos afirmou que “O traballo de Seoane permitiu crear un discurso de identidade ao redor da palabra Galicia”

Xa dentro do cemiterio, a comitiva percorreu ao son das gaitas as rúas do cemiterio e realizou a primeira parada ao pé da tumba de Manuel Murguía, primeiro presidente da Real Academia Galega. Aquí os académicos Margarita Ledo e Eloxio Ruibal leron os nomes dos 57 ilustres enterrados en Santo Amaro ao tempo que se depositaron na tumba de Murguía caraveis para honralos a todos.

Entre as personalidades que descansan no cemiterio figuran Curros Enriquez, Eduardo Pondal, Xoán Casal, Miguel González-Garcés, Francisca Herrera Garrido, Antón Villar Ponte, Isidoro Brocos, Enrique Carré Alvarellos, Ánxel Casal, Durán Loriga ou os obreiros falecidos na primeira folga en Galicia.

De seguido a comitiva dirixiuse polo paseo central ata a tumba de Luís Seoane, na que a poeta e académica Luz Pozo Garza e mais María Xosé Bravo depositaron unha coroa de flores cunha banda coas cores da bandeira galega.

No acto central, interveu Xosé Luís Méndez Ferrín quen se referiu ao o cemiterio de San Amaro como o maior espazo de memoria literaria, científica, cultural, política e histórica de Galicia.

Logo, centrouse na figura de Seoane, “a figura intelectual galega máis importante da segunda metade do século XX”, para dicir del que logo de “nacer en Bos Aires, escolleu ser galego, e elixiu A Coruña como a cidade á que pertencer”.

“Luís Seoane perseguía unha visión axeitada ao humanismo laico para que unha Galicia consciente coñecese as súas raíces históricas, pero tamén míticas”.

“Foi un home que miraba o mundo, que estivo na política, en maiúsculas” “Como suxeito histórico foi un apaixonado do ben individual que tiña sede do ben colectivo. Tivo unha visión de Galicia nacida dende a racionalidade e non só dende o corazón” e que “cos valores do humanismo, sempre traballou, e fíxoo a fondo na construción nacional”.

O acto concluíu coa interpretación do Himno Galego por Cantigas da Terra

Esta homenaxe foi un dos últimos actos cos que se celebra o centenario do nacemento do prolífico Luís Seoane, un intelectual polifacético considerado un dos máximo referentes da cultura galega da segunda metade do século XX.

CURSO DE PRIMEIROS AUXILIOS

Cáritas Parroquial de Arca e O Pino organiza un curso de primeiros auxilios de 10 horas de duración a celebrar en tres días do vindeiro mes de febreiro. Aos participantes outorgaráselle un diploma oficial de asistencia.

O prezo do curso é de 10 euros, pero os socios da ANPA do CPI Camiño de Santiago terán un desconto do 50%

O teléfono de contacto para obter máis información a través da ANPA é o 629 646 692.

Cando sexa oficial o calendario definitivo, tódalas persoas interesadas serán informadas telefonicamente dos días e do horario nos que se desenvolverá o curso.

PROGRAMACIÓN CULTURAL DE NADAL

A Concellaría de Cultura do Concello de O Pino anuncia a súa programación de Nadal, que pretende ser variada, atractiva e novidosa para satisfacer tódolos gustos e atender as diferentes idades.

O martes, 21 de decembro Papá Noel visitará as escolas unitarias, o Pai e o CPI Camiño de Santiago para recoller as cartas dos escolares de 0 a 7 anos que recibirán un conto en galego como agasallo.

O mércores día 22 a partir das 10:00 horas, no auditorio do Centro Sociocultural Luís Seoane, terá lugar o tradicional Festival de Nadal promovido como actividade complementaria do CPI Camiño de Santiago en colaboración coas escolas unitarias.

O domingo 26, a partir das 19:30 horas, a Banda de Música de Arca interpretará no auditorio do Centro Sociocultural o Concerto de Nadal.

O domingo 3 de xaneiro complétase a oferta musical a partir das 19:00 horas co Festival de Corais organizado polo Coro de Arca no Centro Sociocultural.

O mércores 5 de xaneiro, as SS.MM. os Reis Magos visitarán tódalas parroquias do concello na xa tradicional Cabalgata de Reis, que rematará cunha gran festa no polideportivo municipal, a partir das 17:00 horas. Os asistentes poderán degustar rosca e chocolate quente.

CONVOCATORIA DUNHA PRAZA DE DINAMIZADOR SOCIAL PARA O CONCELLO

O prazo de presentación de instancias é de dez días naturais

O Concello de O Pino saca a concurso mediante proceso selectivo unha praza de dinamizador social. A duración do contrato será de un ano e realizarase pola modalidade de obra ou servizo determinado.

As persoas interesadas deben presentar as instancias dirixidas ao Alcalde no Rexistro do Concello no prazo de dez días naturais.

No caso de optar por remitir a solicitude a través do correo ou por calquera das formas establecidas no artigo 38 da LRXAP-PAC, o interesado deberá anunciar ao Concello o envío da instancia mediante fax antes de que remate o prazo de presentación para que a instancia sexa admitida.

Pódese obter unha copia das bases da convocatoria nas oficinas do Concello.

CURSO DE MANIPULACIÓN DE ALIMENTOS

Está aberto o prazo de inscrición para a realización dun curso de manipulación de alimentos o vindeiro 17 de decembro. As persoas interesadas deben presentar as súas solicitudes nas oficinas de Desenvolvemento Local. O teléfono de contacto para obter máis información é o 981 511 002.

LECER NADAL 2010: ABERTO O PRAZO DE INSCRICIÓN

Desenvolverase a partir do 23 de decembro

O Concello de O Pino organiza o programa Lecer Nadal 2010, destinado a escolares de idades comprendidas entre os 3 e os 12 anos.

O programa oferta unha variada gama de actividades lúdicas, obradoiros, manualidades, xogos populares, etc. que se desenvolverán nas instalacións do CPI Camiño de Santiago os vindeiros 23, 24, 27, 28, 29, 30, 31 de decembro e 3, 4, 5, 7 de xaneiro.

O prezo do programa, incluíndo o 50% de desconto para os empadroados en O Pino, vai desde os 6 euros diarios ata os 12. O prezo reducido inclúe só a participación nas actividades desde as 9:30 ata as 14:00 horas, pero os participantes poden optar tamén por incluír o almorzo desde as 7:30 ata as 9:30 horas por 2 euros máis, ou incluír o xantar desde as 14:00 horas ata as 15:30 con aumento de 4 euros na tarifa. Os escolares que opten polo servizo completo pagarán 12 euros e participarán na actividade desde as 7:30 ata as 15:30 horas.


As familias interesadas poden realizar as inscricións na Casa do Concello ata o mércores 15 de decembro.

RESOLTO O V CONCURSO DE FOTOGRAFÍA CONCELLO DE O PINO.

As nove fotografías premiadas configurarán o calendario municipal para o ano 2011

O xurado do certame acaba de seleccionar as nove imaxes premiadas no V Concurso de Fotografía

Resultaron gañadores das tres categorías establecidas e obtiveron un premio en metálico de 125€, Patricia Santos en Natureza, Marcos Rey en Patrimonio e Cristina Guerra en Personaxes.

Os outros dous galardoados, segundo e terceiro, de cada categoría foron André Díaz (75€) e Isabel Domínguez (50€), en Natureza; Alberto Pampín (75€) e Cristina Villar (50€), en Patrimonio, e en Personaxes, o segundo premio foi para Marcos Fernández e o terceiro, para Cristina Guerra.

As fotografías poderán contemplarse proximamente na entrada da Casa do Concello de O Pino e serán incluídas no calendario municipal do ano 2011.

Queda por confirmar a data de entrega de premios.

VÍA LIBRE PARA O PROGRAMA LECER NADAL

O Concello de O Pino fomenta a compaxinación da vida laboral e familiar

O Consello Escolar do CPI Camiño de Santiago acaba de autorizar a utilización das súas instalacións para que o Concello desenvolva o programa LECER NADAL.

Trátase dunha iniciativa promovida desde os servizos de Conciliación Familiar do Concello para atender os escolares de O Pino durante o período de vacacións de Nadal e axudar así ás familias a compaxinar a vida laboral e familiar.

O programa LECER NADAL desenvolverase desde o 23 de decembro ata o 7 de xaneiro con horario de 7:30 a 15:30 horas.

CONSTITUÍDO O NOVO CONSELLO ESCOLAR

A sesión trasladouse á Biblioteca ao estar ocupada a sala de xuntas coas eleccións sindicais.

O novo Consello Escolar do CPI Camiño de Santiago quedou constituído nunha sesión ordinaria deste órgano colexiado que se celebrou onte ás 17.30 horas na biblioteca Luís Seoane.

Nesta primeira sesión do Consello Escolar foron creadas a nova Comisión Económica e o Observatorio de Convivencia. Tamén se autorizou ao Concello o desenvolvemento do programa Lecer Nadal utilizando espazos do CPI. Non foi aprobada a solicitude do alumnado de 4º de ESO de vender bebidas azucradas e pastelaría industrial.

ELECCIÓNS SINDICAIS

O colectivo docente votou os seus representantes

Un total de 32.384 docentes do ensino público non universitario elixiron onte os seus representantes sindicais, logo de que as Mesas coordinadoras acordaron trasladar por motivos meteorolóxicos o día de votación, previsto inicialmente para o pasado día 2.

Presentaron candidaturas as organizacións sindicais Confederación Intersindical Galega (CIG), Comisións Obreiras (CC.OO.), Unión Xeral de Traballadores (UGT), ANPE-Sindicato Independiente (ANPE), Sindicato de Traballadoras e Traballadores do Ensino de Galicia (STEG) e Central Sindical Independente e de Funcionarios (CSIF).

As mesas electorais, que abriron ás once da mañá estiveron abertas ata as seis e media da tarde.

No CPI Camiño de Santiago, onde se localizou a mesa electoral 247, a porcentaxe de participación nestas eleccións foi alto, do 83%, ao exerceren o seu dereito a voto 39 docentes dos 47 censados.

Nesta mesa electoral a forza máis votada foi a CIG, que obtivo o 83% dos votos emitidos, 34 puntos porcentuais máis que CC.OO. En terceiro lugar situouse o STEG co 13% dos sufraxios seguido da UGT, co 8%, e de ANPE que obtivo o 3%. A CSIF non obtivo a confianza dos electores. Ademais, o 10% dos electores optaron polo voto en branco e un dos sufraxios resultou nulo.

XORNADA ESCOLAR ATÍPICA POR MOR DO XEO

A xornada escolar do venres quedou truncada no CPI Camiño de Santiago debido ás circunstancias meteorolóxicas. A rede viaria local amenceu cuberta de xeo en moitos puntos impedindo o funcionamento do transporte escolar de tódalas rutas agás a que serve a empresa Freire.

Ao chegar ao centro, parte do alumnado transportado optou por chamar ás súas casas para que viñeran a recollelos, polo que o colectivo docente tivo que suspender as actividades previstas e optou por realizar outras complementarias ou de reforzo por quendas co escaso alumnado que decidiu permanecer toda a xornada no centro.

Parte dos mestres e mestras de E. Infantil e E. Primaria, tamén aproveitaron a xornada para adiantar traballo na preparación das actividades de Nadal.

MODIFICACIÓN DO HORARIO ESCOLAR POR ALERTA DE NEVE E XEO

Educación trasladou a responsabilidade da decisión aos equipos directivos.

O CPI Camiño de Santiago adiantou o horario de saída seguindo as instrucións remitidas aos centros pola Consellería de Educación mediante un correo electrónico no que comunicaba a alerta por neve e xeo e se pedía a adopción das medidas de precaución necesarias «en atención ás circunstancias meteorolóxicas locais».

A dirección do centro, logo de consultar coas empresas de transporte escolar sobre as dificultades para o regreso dos escolares a casa, considerou necesaria a redución da xornada escolar como medida preventiva e decidiu adiantar o horario de saída.

Así, o alumnado de ESO rematou as clases ás 13:30 e o alumnado de E. Infantil e Primaria retornou aos seus domicilios unha vez que o trasporte escolar volveu de realizar o servizo da ESO.

V CONCURSO DE FOTOGRAFÍA DO CONCELLO DE O PINO.

O prazo de presentación de obras remata o 10 de decembro

A Concellaría de Educación do Concello de O Pino organiza a 5ª edición do Concurso de Fotografía.

As persoas interesadas en participar nesta edición poden optar por tres categorías: personaxes, natureza e patrimonio, presentando, ata o 10 de decembro, obras inéditas de temática relacionada co concello de O Pino.

As bases establecen tres premios en metálico por categoría. Os gañadores obterán 125 euros, os segundos 75, e os terceiros 50 euros.

APROBADO O ORZAMENTO MUNICIPAL PARA O 2011

A crise obriga a un recorte do 7,45 por cento.

A Corporación aprobou en sesión extraordinaria o orzamento do Concello de O Pino para o 2011, que contou cos votos favorables do PP, a abstención dos socialistas, e o voto en contra do BNG.

No ano 2011, o Concello xestionará 3.939.263 euros. Esta cantidade supón unha redución de 316.737 euros respecto do orzamento do ano 2010 que ascendía a 4.256.000 euros.

A pesar deste recorte do 7,45 por cento por mor da crise, o investimento crecerá máis dun 100%, pois dos 598.000 euros investidos no ano 2010 pasarase a dispoñer de 1.296.000 euros para esta partida. Será o gasto o que sufrirá un recorte drástico.

O PINO TERÁ TANATORIO A FINAIS DO 2012

Disporá de tres salas e crematorio.

O Pino disporá de tanatorio a finais do ano 2012 nunha parcela da rúa das Minas, en Pedrouzo. Este novo servizo promóveo Funeraria Martínez, que xa conta con tanatorios en Frades e Oroso.

O proxecto foi aprobado no mes de outubro pola xunta de goberno municipal despois de aportar a empresa promotora tódolos permisos necesarios, tanto das consellerías de Sanidade e Medio Ambiente como da Dirección Xeral de Patrimonio e do Comité Asesor do Camiño de Santiago.

As obras de construción, que contan cun orzamento de 400.000 euros e teñen un prazo máximo de execución de vinte e catro meses, execútaas a empresa Construcciones Lagares.

O edificio será construído en dúas plantas con 530 metros cadrados útiles e disporá de tres salas, crematorio e cafetaría. Tamén ofertará servizos asociados.

SENDA PEONIL PARA COMUNICAR O PINO CON TOURO

A Deputación de A Coruña aprobou un orzamento de case 220.000 euros para a execución do proxecto de construción dunha senda peonil de dous quilómetros entre os núcleos de Cebreiro, en O Pino, e Fonte Díaz.

A senda discorrerá por unha das marxes da estrada que comunica os citados núcleos de poboación.

En breve, o proxecto pasará á fase de exposición pública e presentación de alegacións.

NADAL SOLIDARIO

Promovido polo departamento de Relixión.

Desde o CPI Camiño de Santiago estanse organizando dúas campañas solidarias que se desenvolverán nos vinte primeiros días de decembro. A Operación Quilo está destinada á adquisición de alimentos non perecedoiros, como aceite, arroz, cereais, legumes ou pastas. A actividade Un xoguete, unha ilusión consiste na recollida de xoguetes novos ou en bo estado.

As doazóns depositaranse nunhas caixas específicas localizadas na entrada do centro ata o día 20 de decembro, para logo cederllas a Cáritas ou a outras iniciativas que fan entrega directa a familias sen oportunidades e medios.

Esta é unha boa oportunidade para desenvolver valores solidarios na comunidade escolar.

O CONCELLO MODIFICA AS SÚAS ORDENANZAS FISCAIS PARA O 2011

Afecta á legalización de vivendas unifamiliares e á apertura de negocios

A corporación municipal do Concello de O Pino acaba de aprobar no último pleno a modificación das ordenanzas fiscais. Este cambio afecta sobre todo ás taxas para a legalización de vivendas unifamiliares e á apertura de establecementos públicos.

A modificación das ordenanzas sobre as casas era necesaria para adaptalas á Lei do Solo recentemente reformada. Con esta modificación, os propietarios de vivendas unifamiliares construídas sen licenza municipal poderán xestionar a súa legalización por un custo de 600 euros.

A modificación que afecta á apertura de establecementos públicos céntrase no cambio de criterio establecido para o pagamento de taxas. As novas tarifas estableceranse fundamentalmente en función dos metros públicos dispoñibles e non, como até agora, polo número de empregados contratados ou polo gasto en electricidade.

V CONCURSO DE POSTAIS DE NADAL

O Concello de O Pino abre a convocatoria ata o 30 de novembro.

O Concurso de Postais de Nadal vai dirixido aos rapaces e rapazas de O Pino escolarizados desde E. Infantil ata a Educación Secundaria e divididos en cinco categorías, das que tres corresponden aos ciclos de Educación Primaria.

Os interesados/as poden participar de forma individual ou en grupo e presentarán unha única postal realizada en calquera técnica sobre formato DIN-A4 na que poden incluír algunha mensaxe ou desexo para o 2011 en lingua galega.

Os traballos, que deberán ser inéditos e incluír por atrás os datos do autor (nome e apelidos, idade, enderezo e número de teléfono) poden presentarse no CPI Camiño de Santiago, no Concello de O Pino ou na Biblioteca Municipal ata o martes, 30 de novembro.

Premiarase unha postal por categoría e de entre estas elixirase a que utilice o Concello para felicitar as festas a toda a veciñanza.

A entrega de premios realizarase durante a celebración do Festival de Nadal organizado polo CPI Camiño de Santiago. O gañador/a de cada categoría recibirá un lote de libros en galego e outros elementos educativos.

ASEMBLEA DA ANPA

Mediante unha nota enviada desde as aulas, a directiva da ANPA do CPI Camiño de Santiago convocou a tódolos socios e socias da asociación a unha asemblea xeral ordinaria que se desenvolverá na sala de usos múltiples do CPI o xoves 25 de novembro ás seis da tarde.

Os puntos da orde do día son o balance de gastos e ingresos do curso 2009-2010, a xestión das actividades extraescolares e finalmente pregos e preguntas.

CONCURSO LUÍS SEOANE 2010 - 2011

ABERTO O PRAZO DE PRESENTACIÓN DE TRABALLOS PARA O CONCURSO DE REDACCIÓN

O Concurso de redacción “Luís Seoane” está dirixido ao alumnado do CPI Camiño de Santiago que pertenza a 6º de E. Primaria ou á ESO.

Os participantes na presente edición 2010-2011 deberán presentar un traballo en prosa ou en verso no que o argumento se desenvolva nunha fraga galega e terá como protagonistas algún elemento da flora e da fauna autóctonas.

O prazo de presentación dos traballos remata o 14 de xaneiro e serán entregados ás respectivas profesoras de lingua Galega na ESO e ao titor en 6ª de EP.

Haberá un xurado formado polos compoñentes do EDNLG que outorgará un premio por cada curso participante. A decisión do xurado darase a coñecer na última semana de febreiro e a entrega de premios aos gañadores farase na semana das Letras Galegas.


CONCURSO DE PINTURA

O concurso de pintura vai destinado a todo o alumnado de EP e EI escolarizado nos centros educativos do Concello de O Pino.

Os participantes realizarán as súas obras en folios A4 utilizando calquera técnica e serán realizados no centro escolar.

As obras farán referencia a un dos traballos premiadas ou finalistas no concurso de redacción, polo que a partir da última semana de febreiro cada aula terá copia da narración sobre a que os concursantes han de centrar a súa obra plástica.

O prazo de entrega dos traballos remata o 29 de abril, data na que comezarán a ser expostos nos corredores do CPI Camiño de Santiago para seren seleccionados polo xurado.

O xurado estará composto polos membros do EDNLG e pola profesora de EPV. Os traballos premiados serán expostos do 9 ao 20 de maio e os premios serán entregados na segunda quincena do mesmo mes.

ROTUNDO ÉXITO DA BANDA DE ARCA NO IV CERTAME GALEGO DE BANDAS DE MÚSICA

Clasificouse no primeiro lugar da III Sección e ademais obtivo o premio á peza de autoría ou temática galegas.

A Banda de Música de Arca brillou con luz propia no IV Certame Galego de Bandas de Música organizado pola Consellería de Cultura e a Federación Galega de Bandas de Música Populares.

Na tarde do venres 19 de novembro, diante de máis de 400 persoas que se achegaron á sala Ángel Brage do Auditorio de Galicia, desenvolveuse a fase correspondente á sección terceira do Certame, que está integrada por bandas cunha formación igual ou inferior a 45 membros.

Participaban as agrupacións musicais de Belesar e A Guarda e as bandas de música de Arca, Chapela e Guitiriz.

Cada grupo interpretou un pasodobre como presentación previa ao Certame, para logo proseguir coa obra obrigada Auga Levada, de Juan Eiras, premiada no II Concurso Galego de Composición, e finalizar cunha peza de libre elección.

A Banda de Música de Arca fixo a súa presentación co pasodobre Don Víctor, de Ferrer Ferrán, continuou con Auga Levada e rematou coa interpretación maxistral da obra Gavilán, de Antón Alcalde, razón pola que obtivo o premio á peza de autoría ou temática galegas. Ademais clasificouse no primeiro posto do Certame ao acadar un total de 302,5 puntos polo conxunto da súa interpretación.

A Agrupación Musical de Belesar foi a segunda clasificada con 266 puntos e a Banda de Música de Chapela acadou o terceiro lugar con 221 puntos. A Agrupación Musical de A Guarda obtivo o galardón ao cuarto posto, outorgado pola FGBMP.


Impecable traxectoria no Certame.

Esta era a terceira participación da Banda de Música de Arca no Certame Galego de Bandas de Música. Nas participacións anteriores xa tivera unha actuación destacada acadando nas dúas o segundo posto da sección terceira, que encadra as formacións que non superan os 45 músicos.

O seguinte vídeo da FGBMP recolle a interpretación de Novelda, de Juan M. Molina na participación do ano 2009.

RENOVACIÓN DO CONSELLO ESCOLAR

Proclamación de candidatas e candidatos.

Logo de rematado o prazo de presentación de candidaturas, foron proclamados pola Xunta Electoral os candidatos e candidatas a representantes dos distintos sectores da comunidade escolar.

En representación do alumnado, figuran as candidaturas de Verónica Crego Rama, Eva Negro Vázquez e Rubén Vázquez Vaamonde.

Presentaron candidatura para representar aos pais, nais ou titores legais do alumnado, Julia Barbosa Sánchez e Mª Isabel Vázquez Agra.

As candidaturas de Juan Padín e Ana Belén Piñeiro figuran en representación do persoal de administración e servizos.

Para representar ao colectivo docente figuran as candidaturas de Andrés Díaz Pazos, Suso López Gromaz, Susana Parrado Otero, Francisco J. Tobar Cereijo, Mª Teresa Torreiro González e José Tubío Lorenzo.


Datas das eleccións

O profesorado elixirá os seus representantes en sesión extraordinaria do Claustro convocado para as 14:30 horas do 24 de novembro.

O día 25 correspóndelle ás nais, aos pais e aos titores legais a elección dos seus representantes de entre as candidaturas presentadas. A súa mesa electoral estará aberta desde as 12:00 ata ás 17:00 horas.

Os representantes do alumnado serán elixidos o 30 de novembro mediante votación do alumnado de ESO. A mesa electoral do alumnado abrirá desde as 10:10 ata as 10:30 e desde as 14:30 ata as 15:50

O mesmo día, 30 de novembro, o persoal de administración e servizos procederá á elección do seu representante entre as 16:40 e as 17:00 horas.

Finalmente, a celebración da primeira reunión do novo Consello Escolar está prevista para o 9 de decembro.

ABERTA A AULA ABERTA

Funciona tódolos venres no centro cultural desde as 17:30 ata as 19:30 horas.

Dentro das medidas de apoio á conciliación familiar, o Concello de O Pino puxo en marcha por segundo ano consecutivo a Aula Aberta, unha iniciativa cultural e educativa destinada ao lecer, ao fomento da creatividade e á aprendizaxe.

A actividade da Aula Aberta desenvólvese gratuitamente no centro cultural Luís Seoane durante dúas horas tódolos venres a partir das as 17:30.

Os participantes, unha vintena de escolares con idades comprendidas entre os 3 e os 13 anos, desenvolven actividades que incentivan e estimulan de maneira libre a súa creatividade e o seu crecemento persoal.

Entre as propostas, figuran xogos e exercicios de lecer, traballos manuais, debuxo, lectura, música e cancións.

FALLADOS OS PREMIOS DA CULTURA GALEGA 2010

Agustín Fernández Paz rexeitou o premio na categoría das Letras.

Cos Premios da Cultura o xurado distingue en sete categorías a persoas e institucións que traballan nos distintos eidos da creación, da conservación e revalorización do patrimonio e da actualización e difusión do capital intelectual de Galicia. O premio, sen dotación económica, consiste nunha escultura ou obxecto conmemorativo realizado por un artista galego de recoñecido prestixio e nun diploma acreditativo. As sete categorías a premiar son: Letras, Artes Plásticas, Artes Escénicas, Iniciativas en favor do Patrimonio Cultural, Promoción Cultural de Galicia, Música e Creación Audiovisual.

O escritor Agustín Fernández Paz foi galardoado co premio Cultura Galega das Letras en recoñecemento á súa traxectoria vinculada á literatura galega.

A artista Menchu Lamas recibirá o Premio Cultura Galega dás Artes Plásticas polo seu traballo creativo.

En Eduardo Alonso Rodríguez reacaeu o Premio Cultura Galega das Artes Escénicas polo seu traballo a favor da dramaturxia galega.

A Fundación Barrié resultou distinguida co Premio Cultura Galega ás Iniciativas en prol do Patrimonio Cultural polo seu traballo de catalogación e restauración de bens patrimoniais.

O Premio Cultura Galega á Promoción Cultural de Galicia recoñece á Editorial Galaxia pola súa traxectoria vinculada á expansión cultural de Galicia fóra da comunidade autónoma e á súa difusión no exterior.

A Orquestra Sinfónica de Galicia recibiu o Premio Cultura Galega de Música pola súa traxectoria vinculada á creación, consolidación e expansión da música galega, dentro da comunidade e no exterior.

O Premio Cultura Galega de Creación Audiovisual distingue á produtora Vaca Films pola súa actividade, dentro da comunidade e no exterior, "a favor dunha linguaxe de calidade, con personalidade propia e con capacidade para integrarse nos escenarios internacionais".

Agustín Fernández Paz rexeita o galardón.

Pola súa banda, Agustín Fernández Paz, referente da Literatura infantil e xuvenil de Galicia, rexeitou o Premio da Cultura Galega das Letras que lle foi concedido onte por un xurado presidido polo conselleiro de Cultura.

Fernández Paz declina aceptar o galardón mediante un comunicado, no que expresa a súa gratitude ás persoas do xurado por pensaren nel. Mais manifesta que non pode aceptar o premio por coherencia, pois cando os Premios da Cultura Galega foron convocados, el expresou o seu desacordo con eles e afirma que segue a pensar o mesmo.

TIRO CON ARCO

I LIGA GALEGA DE CLUBES. FASE PREVIA

A segunda xornada da fase previa da liga celebrouse o sábado 13 de novembro no pavillón municipal de Pedrouzo, en O Pino.

O club ARCO DA VELLA, nacido en xuño de 2008 en Oza dos Ríos, colocouse na cabeza da clasificación do seu grupo grazas a unha táctica acertada e a puntería dos seus arqueiros. Este club chegaba clasificado en terceiro lugar despois de celebrada a primeira xornada. Agora ségueo na clasificación o club ARC-TEIXO en segunda posición e o CAMBRE que ocupa o terceiro posto.

Esta clasificación ten carácter provisorio ata que na próxima fin semana se celebre a última xornada en Boimorto e será entón cando se decidan os equipos que pasan a seguinte fase para loitar polo título.

Na modalidade de arco recurvo hai un total de 16 equipos procedentes da práctica totalidade de clubs galegos competindo nesta fase inicial.

RENOVACIÓN PARCIAL DO CONSELLO ESCOLAR

Continúa aberto o prazo de presentación de candidaturas


En cumprimento do establecido no Decreto 7/99 do 07 de Xaneiro polo que se implantan e regulan os Centros Públicos Integrados (DOG do 26 de xaneiro) corresponde renovar parcialmente os membros do Consello Escolar.

Segundo o calendario establecido pola Xunta Electoral, o prazo de presentación de candidaturas aos distintos sectores está aberta desde o 4 de novembro e remata o vindeiro día 15.

O Consello Escolar é o órgano colexiado de goberno mediante o que participan na xestión do centro educativo tódolos sectores da comunidade a través dos seus representantes. Como os demais órganos de goberno, o Consello Escolar velará pola efectiva realización dos fins da educación, pola mellora da calidade do ensino e pola configuración dun auténtico ensino galego, con total respecto ós principios e valores da Constitución española e do Estatuto de autonomía de Galicia.

Datas das eleccións

O día 25 de novembro correspóndelle ás nais, aos pais e aos titores legais a elección dos seus representantes de entre as candidaturas presentadas. A súa mesa electoral estará aberta desde as 12:00 ata ás 17:00 horas.

Ese mesmo día, o profesorado elixirá os seus representantes en sesión extraordinaria de Claustro convocado para as 17:50 horas.

Os representantes do alumnado serán elixidos o 30 de novembro mediante votación do alumnado de ESO. A mesa electoral do alumnado abrirá desde as 10:10 ata as 10:30 e desde as 14:30 ata as 15:50

O mesmo día, 30 de novembro, o persoal de administración e servizos procederá á elección do seu representante entre as 16:40 e as 17:00 horas.

Finalmente, a celebración da primeira reunión do novo Consello Escolar está prevista para o 9 de decembro.

GRUPO DE FRAUTAS DO CPI

Aberto o prazo de inscrición

Desde o departamento de música do centro ofértase ao alumnado a posibilidade de constituír un conxunto de frautas.

O grupo estaría formado por 6-8 frautas e ensaiaría no segundo recreo do luns e tamén no segundo do mércores ou xoves para tocar unhas pezas durante o curso.

Para participar só se require ler un pouco de música e ter moitas ganas de pasalo ben tocando frautas de diferentes tamaños e escoitando o seu efecto en conxunto.

NOVO BILLETE METROPOLITANO

Mellora a mobilidade dos veciños de O Pino coa implantación do billete único nos autobuses urbanos e comarcais de Santiago.

A nova tarxeta metropolitana suporá un gran aforro para os usuarios do transporte público.

O Consello da Xunta aprobou un convenio entre a Consellaría de Infraestruturas, o Concello de Santiago e a U.T.E Tralusa, que se encarga do servizo do transporte urbano de Compostela.

O convenio, que prevé un investimento de 830.000 euros por parte da Xunta, facilitará a compra de máquinas de nova tecnoloxía que permitirán a implantación da tarxeta metropolitana, coñecida como billete único.

A nova tarxeta permitirá conectar o transporte interurbano da área metropolitana de Santiago cos buses urbanos da cidade. Deste xeito, facilitarase a mobilidade tanto aos habitantes de Santiago como aos veciños dos 11 municipios adscritos ao Plan de Transporte Metropolitano de Santiago: Ames, Boqueixón, Brión, Oroso, O Pino, Teo, Touro, Trazo, Val do Dubra e Vedra.

O usuario que posúa a nova tarxeta de transporte metropolitano beneficiarase dun gran aforro porque poderá acceder á rede de servizos cun novo sistema de tarifas zonal que reduce prezos e poderá realizar transbordos entre redes sen penalización.

NOVA ESCOLA DE MÚSICA

As obras de rehabilitación do edificio que acollía o antigo centro de saúde estarán finalizadas previsiblemente a principios de decembro.

Cando finalicen as obras, o edificio albergará a futura escola de música e ó mesmo tempo o Concello fará as xestións necesarias para que a Escola de Música de O Pino teña carácter oficial.

DÚAS NOVAS DEPURADORAS PARA O PINO

Entrarán en funcionamento no primeiro trimestre de 2011.

O Concello do Pino xestionou coa Deputación a construción de dúas novas depuradoras para mellorar o abastecemento das parroquias de Arca e Castrofeito.

A realización das das dúas obras conta cun orzamento total que supera os 170.000 euros, 82.000 euros destinados a da parroquia de Arca e 89.300 euros para a de Castrofeito.

A depuradora que se construirá na parroquia de Arca situarase na rúa do Picón e terá capacidade para abastecer unha poboación próxima aos 3.000 habitantes, mentres que a de Santiso abastecerá a unha poboación próxima aos 700 veciños.

Está previsto que as dúas novas depuradoras entren en funcionamento no primeiro trimestre de 2011 en substitución das hoxe existentes nos mesmos núcleos.

MAGOSTO 2010

A castaña é a protagonista

Ao longo da presente semana desenvólvense no centro diversas actividades relacionadas co magosto, dinamizadas desde o Equipo de Dinamización da Lingua Galega -EDLG- e o comedor escolar.
O día 5 de santos inaugurouse a exposición “Froitos do outono” que se pode visitar na entrada do centro grazas ao bo facer das colaboradoras do comedor.
O venres 12 de santos cerraranse as actividades cunha festa gastronómica diferenciada por etapas.
O xantar da ESO terá lugar no patio superior entre as 12.10 e as 14.10 e inclúe no menú chocolate da República Dominicana, cola de Oregon, auga de Lardeiros, croissant do Amenal e castañas de Xinzo previamente amosegadas.
O xantar de Educación Infantil e Primaria, que inclúe tortilla española, ensalada e froita celebrarase no comedor desde as 14.30 ata as 15.30.

CURSO – OBRADOIRO ABALAR

Abalar comeza a abalar

O martes 9 de novembro, o coordinador TIC presentou as características do curso – obradoiro Abalar nunha sesión inicial que tivo lugar na sala do profesorado. Este curso está destinado á formación inicial do profesorado que imparte docencia en 5º de E. Primaria e 1º de ESO, niveis nos que se implantan as aulas Abalar. A duración do curso-obradoiro será de 50 horas e realizarase no propio centro nun espazo por determinar. As sesións terán lugar os martes de 17.30 a 20.30 e os xoves de 16.30 a 19.30 e desenvolveranse entre novembro do 2010 e maio do 2011. O obxectivo principal desta actividade de formación é familiarizar o profesorado cos elementos da aula Abalar para poder empregalos como un recurso máis na aula.

ESCOLA INFANTIL DE O PINO

A Consellería de Benestar ratifica para o 2011 a escola infantil de O Pino

Ata de agora o concello só dispón de un punto de atención á infancia.

Beatriz Mato, a conselleira de Benestar, anunciou que está prevista a construción e posta en funcionamento da escola infantil autonómica de O Pino para o ano 2011.

Esta nova escola infantil, que agora se atopa na fase de elaboración do proxecto, contará con tres unidades que permitirán dispoñer de 41 prazas.

Na actualidade, O Pino conta con un Punto de Atención á Infancia (P.A.I.), localizado en Pedrouzo que funciona os días laborables en horario de mañá (09:30-13:30) e tarde (16:00-20:00) para atender a nenas e nenos con idades comprendidas entre os 6 meses e os 3 anos.