Na madrugada do pasado 21 de marzo, José Luís Lamas Balado, xove de 17 anos veciño do lugar de Suso, na parroquia de San Verísimo de Ferreiros regresaba á súa casa tras pasar a noite na movida en Melide.
José Luís viaxaba de acompañante no asento dianteiro dun Peugeot 206 gris, con placas 9351-DVG que facía a ruta de regreso pola estrada N-547, cando, por causas descoñecidas o vehículo saíu da estrada pola marxe esquerda e se precipitou por un terraplén á altura do punto quilométrico 60,9 da citada estrada nacional, na parroquia arzuana de Santa María de Rendal.
Pouco antes das sete e cuarto da mañá, un veciño da zona que se dirixía ao seu traballo veu o coche envorcado nun paso inferior da estrada e alertou do suceso ao 112.
Unha vez coñecidos os feitos, desprazáronse ata o escenario dos mesmos, entre outros, efectivos do Parque Comarcal de Bombeiros de Arzúa, voluntarios de Protección Civil de Arzúa, ambulancias do servizo de urxencias do 061 coas súas correspondentes dotacións de sanitarios e axentes do destacamento da Garda Civil de Tráfico de Santiago de Compostela, que investigan o sinistro.
Cando os equipos de emerxencias chegaron ao lugar atopáronse un vehículo envorcado nun paso inferior da estrada, polo que discorre o Camiño de Santiago. Os bombeiros tiveron que realizar labores de excarceración para rescatar aos tres mozos do interior do turismo. Segundo informaron, José Luís morreu no acto. O seu cadáver foi trasladado ao Instituto Anatómico Forense de Santiago para practicarlle a autopsia. Os outros dous ocupantes do coche foron levados ao Hospital Clínico en estado moi grave.
Fondo pesar no seo da comunidade escolar
O luns 23 a noticia estendeuse polo CPI. Tanto José Luís, como súas irmás Eva María e Patricia realizaron a súa escolaridade obrigatoria no CPI “Camiño de Santiago” e son persoas moi apreciadas na comunidade escolar.
Ao longo da semana o tráxico suceso estivo presente nas conversas mantidas nas aulas, nos corredores, nos patios,... No grupo de escolares da ESO que mantiña unha maior amizade con José Luís percibíase máis claramente a dor pola inesperada perda dun amigo.